楊明出獄後復工宣傳《一舞傾城》 更生人士無懼有色眼鏡：個人好咗

楊明2020年8月於半山馬己仙峽道發生交通意外，被控不小心駕駛及車窗玻璃透光度不足兩罪。去年12月22日被高等法院駁回不服刑罰上訴，維持原判，即時服刑，入獄18日至今年1月7日出獄。出獄後的楊明變得低調，至今日首次出席公開活動，宣傳TVB新劇《一舞傾城》。

同場加映：

娛樂 • 法言人丨黃嘉樂唔續約TVB老友勁擔心 婚姻出現「小三」強調最愛老婆

{{hket:ul-video id="8158"}}{{/hket:ul-video}}

楊明久未受訪，難免成為焦點，佢表示已經準備好，「重新起步投入工作，多謝公司一直都陪伴支持，所有嘢都係等公司安排，而家主力都係做番《一舞傾城》宣傳，我哋去年去咗佛山拍咗幾個月，等咗一年之後終於有成果，而家盡力宣傳。」至於其他工作仍有待公司安排，被問到《一舞傾城》中被刪戲份，由男一變男二，楊明就表示一直都係咁上下戲份，「冇話咩男一男二，睇劇本就做囉。」另外女主角陳法蓉（Monica）公開大讚楊明，佢話覺得受寵若驚，「Mon姐對上一次（合作）係《賭城群英會》，都6年冇見，跟住喺《一舞》撞番，我嘅戲份多數圍繞Mon姐，所以我哋相處時間比較多，同埋每日收工、返工喺酒店都會見到，所以大家感情非常之好。」

{{hket:inline-image name="DSC_4334.JPG"}}{{/hket:inline-image}}

拍攝時正值係楊明打官司期間，問到會唔會對心情有所影響，佢就話：「拍緊嗰時我放低晒所有嘢，全心投入個角色，冇乜諗私事。因為做戲就要靠個人感情，唔想自己啲嘢影響到個角色，成班兄弟姊妹拍戲都好辛苦，大家都出盡全力，唔想嘥咗任何人嘅苦心。」

楊明表示坐監期間都有好好反省，「都有好多時間靜喺度諗，之後要點行埋人生道路？喺呢幾個月諗咗好多嘢，成長咗好多，日後諗住努力啲做番好自己。」被問到怕唔怕出獄後其他人睇佢會用有色眼鏡？「呢個都係事實，都唔驚，因為都係一個必要情況，經過呢次教訓個人都會好咗，同埋會繼續尋求正確道路。」又指自己冇再被坐監經歷纏繞，向前看。

被問到會唔會擔心自己吸負評影響劇集，佢就冇特別感到緊張，「我就不嬲有好多負評，唔係特登吸引，呢啲我都控制唔到。」表示今次經歷令佢更加學懂「珍惜」，「珍惜而家所擁有嘅嘢，珍惜同父母相處時間，老人家要多啲時間陪，可能時間同機會都唔係太多。」楊明說出獄後冇再出去飲酒，「係間唔中宴會，有隻酒杯喺前面，敬下酒咁都OK，即係冇話出去再飲酒。」

撰文︰娛樂組

攝影︰林良明、《晴報》圖片